ဖေဖော်ဝါရီ ၁၉ – ၂၀၂၆
SN (VOM)
စစ်ရေးတင်းမာမှုတွေ ရှိနေတဲ့ စစ်ကိုင်းတိုင်း၊ မုံရွာမြို့မှာ ဈေးဆိုင်ခန်းပေါင်း ၁၀၀ ကျော် ပါဝင်တဲ့ ညဈေး (Night Market) ကို ဖွင့်လှစ်သွားမှာ ဖြစ်တယ်လို့ တိုင်းဒေသကြီး အစိုးရအဖွဲ့က အသိပေးထားပါတယ်။
အပန်းဖြေလိုသူတွေ၊ ညဘက် စျေးဝယ်လိုသူတွေအတွက် ကန်သာယာညစျေးကို မြို့အရှေ့ဘက် ကန်သာယာ တောင်ဘက်ကွင်းထဲမှာ ၁၂ ပေပတ်လည်ရှိ စျေးဆိုင်ခန်းပေါင်း ၁၁၀ ခန်း တည်ဆောက်ကာ ဖွင့်လှစ်ပေးမှာဖြစ်ပြီး ဖျော်ဖြေရေး အစီအစဥ်တွေလည်း ပါဝင်တယ်လို့ သိရပါတယ်။
“နေ့ပိုင်း မအားလပ်သူတွေ၊ ဝန်ထမ်းတွေ၊ ညပိုင်း အပန်းဖြေလိုသူတွေအတွက် တေးသံသာတွေနဲ့အတူ ကန်သာယာရဲ့ ညရှုခင်းကို ခံစားရင်း လိုအပ်တဲ့ စားသောက်ကုန်တွေကို ဝယ်ယူနိုင်တော့မှာ ဖြစ်ပါတယ်” လို့ တိုင်းဒေသကြီး အစိုးရအဖွဲ့ရဲ့ အသိပေးချက်မှာ ဖော်ပြထားပါတယ်။
လက်ရှိ မုံရွာမြို့မှာ ဒေသထွက်ကုန်တွေ၊ စားသောက်ကုန်တွေ၊ အဝတ်အထည်တွေကို မြို့ရှိ ချင်းတွင်းရတနာစျေး၊ သာစည်စျေး၊ ဗန္ဓုလစျေး၊ အောင်ချမ်းသာစျေး အစရှိတဲ့ စျေးတွေမှာ ရောင်းချပေးနေတာ ဖြစ်တယ်လို့ သိရပါတယ်။
ဒါပေမယ့် အဲဒီစျေးတွေဟာ နေ့ဘက်မှာသာ ဖွင့်လှစ်ပေးတာကြောင့် နေ့ပိုင်းမှာ အလုပ်လုပ်နေရသူတွေ၊ ဝန်ထမ်းတွေ၊ နေ့ပိုင်း မအားလပ်သူတွေအတွက် စျေးဝယ်ယူနိုင်ဖို့ အခက်အခဲ ရှိနေတာကြောင့် အခုလို ညဈေး ဖွင့်လှစ်ပေးဖို့ စီစဉ်ရခြင်း ဖြစ်တယ်လို့ အသိပေးထားပြီး ဖွင့်လှစ်မယ့်ရက်ကိုတော့ ကြေညာထားခြင်း မရှိသေးပါဘူး။
ဒါနဲ့ပတ်သက်လို့ ဒေသခံတယောက်က
“မြို့က လတ်တလော အခြေအနေ ကောင်းသေးတာ မဟုတ်ဘူး။ နေ့ဘက်တောင်မှပဲ ဘယ်သူမှ အပြင်ကို ရဲရဲတင်းတင်း၊ ဝေးဝေးလံလံ မသွားရဲကြဘူး ဖြစ်နေတယ်။ ညဘက်ဆို ပိုဆိုးတာပေါ့။ အခုလို လုပ်တာထက် မြို့ရဲ့လုံခြုံရေးပိုင်းကို ပြည်သူတွေ စိတ်အေးလက်အေး သွားလာနိုင်အောင်လို့ အဓိက ဦးစားပေး လုပ်သင့်တာ” လို့ ပြောပါတယ်။
လက်ရှိ မုံရွာမြို့မှာ စစ်ရေး တင်းမာနေမှုတွေကြောင့် မြို့တွင်း၊ မြို့ပြင်လမ်းတွေကို ဒေသတွင်း လက်နက်ကိုင် တပ်ဖွဲ့တွေက ညပိုင်းသွားလာမှု ကန့်သတ် ပိတ်ပင်ထားသလို အစိုးရတပ်တွေကလည်း မြို့ပေါ်မှာ စစ်ဆေးမှုတွေ တင်းကျပ်နေတာ ဖြစ်တယ်လို့ သိရပါတယ်။
“အခုလိုအချိန် မုံရွာမှာ ညဈေးဖွင့်မယ်ဆို တော်ရုံ ဘယ်သူမှလည်း သွားကြမယ်မထင်ဘူး။ ရေရှည်အတွက်ဆို ဆိုင်ရှင်တွေလည်း နစ်နာလာနိုင်တယ်။ လက်ရှိ လုံခြုံရေး အနေအထားအရကတော့ မုံရွာမြို့ပေါ်မှာ ညပိုင်းသွားလာမှုကို တတ်နိုင်သမျှ ရှောင်ရှားသင့်တဲ့ အချိန်ပါ” လို့ နောက်ထပ် ဒေသခံတယောက်က ပြောပါတယ်။
မုံရွာ မြို့တွင်း၊ မြို့ပြင် လမ်းပိုင်းတွေမှာ ဘယ်လို ယာဉ်အမျိုးအစားမဆို ည ၇ နာရီကနေ မနက် ၆ နာရီအတွင်း ဖြတ်သန်းသွားလာ အသုံးပြုခွင့်ကို ပြီးခဲ့တဲ့ ဖေဖော်ဝါရီ ၇ ရက်နေ့မှ စတင်ကာ ရက်အကန့်သတ်မရှိ ယာယီ ပိတ်ပင်ထားတယ်လို့ ဒေသတွင်း လက်နက်ကိုင်တပ်တွေက အသိပေး ကြေညာထားတာ ဖြစ်ပါတယ်။
လက်ရှိမှာ အစိုးရတပ်တွေဟာ အိမ်စီးကားတွေ အသုံးပြုကာ မုံရွာမြို့အတွင်း ညအချိန် သွားလာမှုတွေကို ပြုလုပ်နေတာ ဖြစ်တယ်လို့ လက်နက်ကိုင်တပ်တွေရဲ့ အသိပေးချက်မှာ ဖော်ပြထားပြီး အဲဒီလို သွားလာနေမှုတွေကြောင့် တိုက်ခိုက်မှုတွေလည်း အချိန်မရွေး ဖြစ်ပေါ်လာနိုင်တယ်လို့ ဆိုပါတယ်။
Photo – CJ
